Madawat na ang cash incentives sa mga Butuanong Topnotcher sa bag-uhay lang migawas nga resulta sa Licensure Examination for Teachers. Ang mga Butuanong Topnotchers gilangkuban nila Bless Marie Sicad Gomera, Top 8, Roxanne Joyce Nara Salinas ug Henry Joshua Espina Sagmon nga parehong Top 10 ug parehong migradwar sa Caraga State University sa Barangay Ampayon ning syudad. Ang madawat nga insentibo subay sa giaprobahang SP Resolution no. 221-2023 sa tibook pwersa sa Sangguniang Panlungsod isip pag-ila ug pagdayeg sa kalampusang nakab-ot sa mga Butuanong Topnotchers ug naghatag sa dakung dungog ug garbo sa syudad sa Butuan. Ang tulo ka Topnotchers parehong makadawat og tag 10,000 pesos matag usa subay sa SP Ordinance no. 5545-2018 nga giaprobahan ni Mayor Ronnie Vicente Lagnada. Kini aron matabangan nga dunay magamit nga makasugod ug makapangita og trabaho. Ang SP Resolusyon gipangunahan ang pagpangamahan ni Konsehal Joseph Omar Andaya uban nila Cromwell Nortega, Rey Desiata ug Cherry May Busa ug hugtanung gisuportahan ni Vice Mayor Lawrence Fortun.