Makadawat og cash incentives ang mga Butuanong Topnotchers sa Geodetic Engineer Licensure Examination. Gi-ila sa 16th Sangguniang Panlungsod members sa pagpanguna ni Vice Mayor Lawrence Fortun pinaagi sa SP resolution no. 466-2023 ang kalampusan nila Lucille Yu, Top 3, Gegorio Macalisang, Top 4, Rey Joshua Jaque, Top 6, Adelyn Boligor, Top 8, Donna Mae Labaso, Top 9 ug Anlene Jane Eduava, Top 10. Ang unom ka topnotchers parehong produkto ug migradwar sa Caraga State University CSU sa Barangay Ampayon ning syudad sa Butuan. Subay sa SP Ordinance no.5545-2018 ang mga Butuanong topnotchers makadawat og cash incentives gikan sa lokal nga panggamhanan sa Butuan pinaagi ni Mayor Ronnie Vicente Lagnada gumikan sa dungog nga gihatag niini sa syudad. Importante sab kang Mayor Lagnada ang paghatag sa pasidungog sa mga Butuanong topnotchers aron makahatag usab og inspirasyon ug kadasig sa ubang estudyante nga maningkamot sa natad sa academics tungod mao kini ang tinubdan alang sa economic growth sa syudad sa umaabot nga panahon. Ang SP Resolution gipangamahanan ni City Councilor Joseph Omar Andaya uban sa suporta nila City Councilor Reynante Desiata, Cromwell Nortega, John Gil Unay ug Gemma Tabada.