Gipailawom sa oryentasyon ang mga kooperatiba ug association leaders, pribadong sektor ug business sector pinaagi sa natigayong AgriHub Operators Orientation kagahapon sa Van Terminal ning syudad. Kini aron masabtan sa mga buot mag operate sa AgriHub ang proseso ug saktong pagdumala niini asa usa sa makabenipisyo ang vegetable farmers ug konsumador. Sumala ni Manuelito Suan, General Manager sa Butuan Agusan Farmers Multi-Purpose Cooperative andam kining mosulod pagka operator sa agrihub apan gikinahanglan pa niining tun-an ang proseso pinaagi sa tabang sa Agriboost Management Team ug City Agriculturist Office. “Interesado ko sa AgriHub Operation tungod kay it’s another activity of cooperative nga pwede pod makatabang sa mga tawo siguro dako pa kaayo among tun-an pero dili man nato makita kung unsay aktwal kung dili nato sudlan. Usa sa challenge sa agrihub tanan aspeto sa production to marketing then unsa pod ang pagcontrol sa consumer,”pahayag ni Manuelito Suan. Mapasalamaton usab si Victor Emmanuel Ozarraga sa Gawad Kalinga sa kahigayunan nga mapaambit sa katawhan ang tinguhang makatabang pinaagi sa pag operate sa agrihub. “Ang among trabaho mao ang pagkonektar didto sa mga mag-uuma sa mga direktang mopalit tungod kay kasagari ang mahitabo paliton didto sa mga mag-uuma sa ubos nga presyo kadtong nipalit ipasa pod ngadto sa consolidator nga dako-dako ang ipatong sa presyo sa pagpabaligya niini sa mga vendor. Gikan sa mga mag-uuma taas na kaayo ang deperensya sa presyo kay ang vendor mopatong paman so pag abot sa mga consumer taas na kaayo ang pamaliton pero didto sa mga mag-uuma ubos kaayo ang palit,” sumala ni Victor Emmanuel Ozarraga sa Gawad Kalinga. Nakita ni Ozarraga nga mao kini ang paagi nga makatabang sa mga mag-uuma ug konsumador tungod buot niining dunay direktang koneksyon sa mga mag-uuma pinaagi sa pag-operate sa agrihub aron makasiguro nga mokita ang mga mag-uuma ilabina ang mga vegetable farmers. “Nakita namo nga kining agrihub usa ka oportunidad nga amo pod mapaambit ang among ginahimo sa Gawad kalinga. Salamat kaayo kog dako nanghinaut ko nga mahatagan kami sa oportunidad .” Dugang mensahe ni Victor Emmanuel Ozarraga. Kini ang pinaka-unang agrihub sa syudad sa Butuan hinungdan paningkamutan sa mga buot mag operate sa agrihub nga matun-an niini ang proseso gumikan sa dakong responsibilidad asa mao ang komunidad. Mipasalig usab ang nasangpit nga mga buhatan sa city government sa Butuan nga mohatag og giya sa tanang buot mag operate sa agrihub aron mas sayon kanila ang proseso sa tanang rekisitos. Gipasiugdahan sa City Agriculturist Office uban sa Agriboost Management Team ug ni OCEE Assistant Head Atty. Noel Ephraim Antigua ang AgriHub Operators Orientation kagahapon.