Personal nga gitunol ni Undersecretary Claire Dennis Mapa, National Statistician and Civil Registrar General ang mga birth certificate ngadto sa trese ka benepisyaryo ilawom sa Birth Registration Assistance Project kun BRAP, sa Conference Room 2, Cityhall Bldg., kagahapon. Sa mensahe ni Usec Mapa, gikalipay niini ang serbisyo nga gihatag sa City Civil Registry Department sa syudad tungod sa mga inisyatibo ug proyekto nga ilang gipatuman. Gibutyag ni Usec Mapa nga as of year 2020, anaa na sa 96.3% sa populasyon sa tibouk nasud ang nakabaton og birth certificate base sa ilang gipahigayon nga census. Nakita nga duna gihapoy three million ang wala pay birth certificate rason sa paghimo sa Birth Registration Assistance Project kun BRAP. Mapasalamaton sab si City Vice Mayor Lawrence Lemuel Fortun sa pagbisita ni Usec Mapa sa syudad. Gipadayag ni City Vice Mayor Fortun kung unsa ka importante ang pagbaton sa birth certificate. Gani iyang gibutyag nga usa siya sa principal author sa Civil Registration Reform Bill tungod nakita niya nga daghan sa mga residente ang walay Birth Certificate.