Striktong ipatuman sa City Environment and Natural Resources Office kun City ENRO ang dili na pagkolekta sa malata nga basura sugod Enero tuig 2024. Kini base na sa pag uyon sa mga punong barangay sa syudad sa Butuan. Tinguha sa programa nga makab-ot ang zero waste management sa syudad sa Butuan apan makuha lamang kini sa pagtinabangay sa tanan. Kini nga lakang subay sa Executive Order no. 191 Series of 2016 nga gipagawas ni Mayor Ronnie Vicente Lagnada ilawom sa RA 9003 o mas naila sa Ecological Solid Waste Management Act of 2000, Section 5 sa SP Ordinance no. 2380-2002 lakip na ang SP Ordinance no. 3589-2010. Dinhi nakalatid nga ang segregation ug collection sa solid waste pangunahan sa barangay level ilabina ang biodegradable, compostable ug reusable wastes, obligado usab ang syudad sa pagkolekta sa non-recyclable materials ug special waste. Giklaro sa City ENRO nga kolektahon lamang ang mga malata kung ang barangay adunay area nga kabutangan niini. Kung wala, adunay ipahigayong pinirmahay sa kasabutan sa kasikbit nga barangay aron didto mabutang ang malata nga basura. Tungod niini, gihangyo sa lokal nga panggamhanan sa Butuan ang kooperasyon sa tanan nga mamahimong responsable sa pagdumala sa matag basura ug sugdan na ang pagpractice sa composting o bisan unsang paagi sa pagcompost sa malata nga basura sama sa compost pit, compost bin, ug uban pa. Kung mamalit batunan ang pagbitbit og sudlanan aron malikayan ang daghang basura sa ingon malikayan ang kadaot sa kinaiyahan.