Gitapok ang mga Barangay Health Workers sa 86 ka Barangay sa syudad aron na sa paghatag higayon kanila nga makakat-on ug makabalo kalabot na sa Neurological Disorder sa pagpanguna sa Philippine Neurological Association, sa Event Center, SM City Butuan, miaging semana. Ang kalihukan subay sa kasaulogan sa National Neurology Week Celebration. Gisalmutan kini sa mga Barangay Health Care Workers tungod sila ang nag una nga makakita ug makabalo sa sitwasyon sa mga pasyente hilabi na sa grassroots level. Gilangkuban sa mga topic nga Neurodevelopmental Disorders, Epilepsy, Anxiety and Depression, Strokes, Migraine, ug uban pa sa lecture series. Usa si Myrnalou Leagogo, 44 anyos nga taga Barangay Libertad ang misalmot sa Lecture Series. Tuig kapin na siya sa pagka BHW sa ilang Barangay ug sumala niya nga daku kini nga tabang sa sama nilang mga BHW. “Overwhelming siya sa akong part kay I am able to communicate with them, makabalo ka kung unsa ilang situation. As a BHW makatabang pud ta. Dako siya og tabang kay na aware mi what are those necessary nga mga butang nga among mahibaluan para ma impart namo o ma determine sa nasangpit nga mga residente kung naa naba ana sila nga situation,” sumala ni Myrnalou Leagogo. Mahinungdanon ang lecture series aron mahibalo sila sa mga neurological disorder tungod daghan kini nga kaso sa komunidad apan walay awareness kung unsaon kini pag identify. Suportado ni Butuan City Mayor Ronnie Vicente Lagnada pinaagi sa Liga ng mga Barangay ug City Health Office nga palambuon ang kapasidad sa mga Barangay Health Worker sa syudad aron mas matagaan sila og higayon nga daling makatabang hilabi na sa public health situation.