Pormal nga gipresenta kaganinang buntag atol sa natigayong Flag Ceremony sa Butuan City hall ang mga atletang Butuanon nga nakakuhag medalya atol sa natigayong Palarong Pambansa 2024 sa Cebu City. Usa-usang gipa-ila ila ni City Education Development Department Head Rosalito Libres ang mga atletang Butuanon nga nakaangkon og mga medalya sa bag uhay pa lamang natapos nga Palarong Pambansa 2024. 115 ka mga atletang Butuanon ang misalmot sa Palaro. Sa Butuan, nakakuha ang mga atleta og duha ka gold, lima ka silver ug walo ka bronze. Gi-ila sab nga Most Valuable Player sa dulang Arnis Elementary Girls si Airielle Ashley Lape sa Ampayon Elementary School. Alang kang Airielle Ashley Lape, gawas sa mga trainings, pag-ampo ang nahimung susi sa kadaugan nilang mga atleta. “Before ko mag perform kay mag pray pa una adisir ka mag perform, mangayo ka sa Ginoo og kusog sa imung lawas para iya kang tabangan didto pag perform,” sumala ni Airielle Ashley Lape, Gold Medalist-Arnis Elementary Girls. Gitimbaya sa lokal nga panggamhanan sa Butuan sa pagpanguna ni Mayor Ronnie Vicente Lagnada ang Deped, mga atletang Butuanon, Coaches Trainers labina na sab ang mga ginikanan tungod sa kalampusang nakab-ot sa mga atleta ug dungog nga gihatag sa dakbayan.