Gitunol sa lokal nga panggamhanan sa Butuan ang mga nagkadaiyang tabang para sa mga pamilyang naapektuhan sa demolisyon sa Barangay Golden Ribbon ning syudad. Gani, mihatag gilayon og aksyon ang City Housing and Homesite Development Department kon CHHDD alang sa pagrefer sa ilang buhatan sa luna ngadto na sa mga apektado. Gipahibalo ngadto sa mga apektadong pamilya nga andam na ang luna nga ilang kabalhinan. Andam ang CHHDD sa pag assist sa mga apektado kung ugaling aduna nay gusto motukod sa nasangpit nga area. Gi-apuran sab sa lokal nga panggamhanan sa Butuan og mga disaster welfare goods ug non-food items sa mga pamilyang naapektuhan sa demolisyon sa Barangay Golden Ribbon ning syudad. Ang City Social Welfare and Development Department kon CSWDD nanguna sa pag set-up sa Public Welfare Desk nga gipangunahan sa mga Registered Social Workers; pag profile sa mga apektado kung sila ba house owners, renters, ug uban pa aron buhaton nga basehan sa long term intervention sa mga apektado. Nagpahigayon sab og Psychosocial Support Processing alang sa mga apektadong pamilya ug lakip sab nagpahigayon og counseling ug stress debriefing sa mga biktima ang mga social workers; ug nag set-up sa mga tents aron masilungan sa posibleng mamakwit. Gi-andam sab ang Baan Km 3 Evacuation Center kung dunay pamilya nga kinahanglan dayon og kapuy-an. Anaa usab ang presensya sa mga personahe sa City Health Department kon CHD aron sa pagsiguro sa health ug medical needs sa mga apektadong indibidwal. Mihatag gilayon usab og tabang ang buhatan ni Congressman Jose “Joboy” Aquino II katambayayong ang Department of Social Welfare - Caraga sa paghatag og financial assistance. Nikabat sa gatosan ka pamilya ang nakadawat na og financial assistance human sa validation ug payout nga gipahigayon. Gisiguro sab sa mga opisyales sa Barangay Golden Ribbon sa pagpanguna ni Kapitan Juby Del Gado nga luwas ug plastar ang kahimtang sa mga apektadong residente. Padayon nga motabang ang lokal nga panggamhanan sa pagpanguna ni Mayor Ronnie Vicente Lagnada sa mga panginahanglanon sa mga apektadong pamilya.