Nagkatigum ang nagkalain-laing Accredited Community Disaster Volunteers sa gipahigayong ACDV Summit 2024 sa Grand Palace Hotel karong adlawa. Kini gilangkuban sa mga barangay volunteers, LGU DCGs, CDRR Response Team, kauban ang mga disaster responders and partners sama sa DEPED, Boy Scout of the Philippines, Phil Army - ARESCOM, BCPO, Phil Coast Guard ug ang Office of Civil Defense. Gipangunahan sa City Disaster Risk Reduction and Management Department ang summit. Tumong sa summit nga maambitan sa mga pamaagi ang mga volunteers sa social support ug ang psychological distress sa pagtabang panahon sa emerhensya. Lakip sab nga pasidunggan ang mga volunteers ug responders nga naglihok ug nagtabang aron matubag ang tawag sa komunidad. “Kini nga summit naglaum nga mapahugtan ang pagtinabangay ug mahatagan sa saktong training ang mga ACDVs aron mas mapalantip ang kaalam sa mga responders,” sumala ni Mark July Yap, CDRRMD. Sa mensaheng gipaabot ni Konsehal Ferdinand Nalcot, SP Committee Chair on DRR-CCA, pinaagi sa iyang representante Ms Ellen Grace Diloy, nanawagan siya sa whole of city approach nga pagtinabangay panahon sa kalamidad ug tagaan sa dakung pagtagad ang mga pagbansay aron magamit kung adunay trahedya nga mahitabo.