Gi-aprobahan sa Butuan City Development Council kun BCDC atol sa Full Council Meeting sa pagtugot ni Mayor Ronnie Vicente Lagnada ang mga giduso nga long term projects ug programs nga nakahan-ay ug prayoridad sa Annual Investment Program 2024. Kini subay sa lima ka development sector sa lokal nga panggamhanan sa Butuan nga gilangkuban sa Economic Development Sector, Institutional Development Sector, Environment Development Sector, Social Development Sector ug Infrastructure Development Sector. Buot ni Mayor Lagnada nga tutukan ang malungtaron ug lig-on nga serbisyong mahatag sa syudad aron mahimo kining business arm pinaagi sa infrastructure base ug human resource base. Atol sa BCDC Full Council Meeting gipadayag usab ni Mayor Lagnada ang nagkadaiyang proyekto nga on-going ang konstruksyon sama sa Command Center, pagpangkonkreto ug improvement sa mga kadalananan sa kabarangayan ilabina ang rural areas. Usa kini sa gipasigarbo ang Barangay Mandamo nga karon hapit na mahuman ang proyekto, urban drainage ug water system. Gi-anunsyo usab niini ang umaabot nga housing projects sa Butuan City, profiling sa kabarangayan, ang pagpadayon sa International Seaport sa Barangay Lumbocan ug ang pagpalambo sa Agro-Forestry. Aktibong migahin og oras ug misalmot sa diskusyon ug mihatag usab sa suhestyon sa BCDC Full Council Meeting ang 86 Punong Barangay sa pagpanguna ni Liga ng mga Barangay President ug Chairperson sa Infrastructure development sector Gemma Tabada ug ang private sector o Civil Society Organizations CSOs sa pagpanguna ni CSO Representative Engr. Antonio Cabrera. Anaa usab ang suporta sa SP members nga sila Cherry May Busa, Eduardo Gonzalez, Rey Desiata, Vincent Rizal Rosario, SK Federation President Cynth Zephanee Nietes uban ni Atty. William Christian Dela Cruz isip representante ni Congressman Joboy Aquino II. Sa nasangpit nga panagtigum sorpresang miabot si DepEd Asec. Francis Cesar Bringas ug nagpasalamat si Mayor Lagnada sa paggahin og pondo alang sa dugang 4 storey school building sa Barangay Doongan ning syudad. Sa kinatibuk-an malampusong napresentar ang tagsang AIP 2024 sa lima ka sektor sa pagpanguna sa City Planning and Development Office asa muabot sa kapin 14 bilyon ang giduso nga pondo alang sa adoption ug approval sa Sangguniang Panlungsod sa lima ka sector. Kini aron mapadayon ang mga big ticket projects, paghatod ug pagpaduol sa social services sa katawhan, employment services, padayong pag adopt sa digitalization ug quality management system, hinay-hinay nga pag adopt sa modernong transportasyon, agro-forestry subay sa master plan nga giaprobahan ni Mayor Ronnie Vicente Lagnada alang sa progresibong syudad sa Butuan.