Gi-andam na ang lokasyon sa butangan sa malata nga mga basura gikan sa 45 nga Urban barangays sa syudad. Kini ang pagkumpirma ni Liga ng mga Barangay President Gemma Tabada. Mahinumduman nga pinaagi sa Memorandum Order no. 1215 series of 2023 ni Mayor Ronnie Vicente Lagnada nagmando kini sa tanang punong barangay sa syudad sa pagmugna og Barangay Material Recovery ug Composting Facility. Pinaagi sa Ecological Solid Waste Management Act of 2000 (Republic Act 9003) nauyunan sa tanang punong barangay atol sa Annual Investment Plan-City Development Council meeting bulan sa Hunyo tuig 2023 nga ang City ENRO pinaagi sa Ecological Solid Waste Management Division ESWMD dili na kolektahon ang Biodegradable Materials sugod Enero 1 karong tuiga. “Ang among concern sa mga barangay kaning malata,supposed to be everybody’s concern ni ang mga households mao dapat mangitag way especially kadtong areas nga naa pay kayutaan nga pwede magbuhat og compost pit aron didto ra ibutang ang malata kay maconvert mana og fertilizer,” pahayag ni Punong Barangay Gemma Tabada, Liga President. Pinaagi sa liga ng mga barangay, gi-cluster ug gitigum ni Liga President Tabada ang mga barangay nga walay area o kabutangan sa MRF. Tungod niini, nakamugna kini og solusyon pinaagi sa pagpangita og area asa nakita kini sa Barangay Aupagan nga dunay gidak-on nga 2.2 hectares. “So luckily nakakuha nata og area 2.2 hectares dako kaayo siya nga area. Dili lang pod mi nagfocus sa malata kay tungod sa kadako sa area basin among pangitaan og paagi nga kadtong barangay nga walay MRF para didto na ibutang ang mga recyclables kadtong mga basura nga pwede pa nato mabaligya ug mapuslan pa aron mamanage gyod og sakto. Ang liga ng mga barangay naa ta mutabang sa mga barangay,” dugang pamahayag ni Liga President Gemma Tabada. Nagpasalamat si Punong Barangay Tabada sa suporta ni Mayor Ronnie Vicente Lagnada nga mihatag og equipment aron maplastar ang dapit asa ibutang ang malata nga basura. Lakip sab gipasalamatan ang mga partner agencies ug stakeholders nga nagpahayag ug nagpakita sa suporta sa programa. Duna sab mga partners nga gikan pa sa laing syudad nga motabang ug motudlo sa mga bag-ong teknolohiya sa pagproseso sa malata nga basura nga mahimong fertilizer ug mapahimuslan sa mga mag-uuma. “Ang malata nga basura pwede ma-convert into fertilizer.Time will come mahimo ning livelihood. nagkastorya nami sa Kapitan sa Aupagan nga si Kapitan Melanio Laag nga mag create siya og asosasyon with 15 members ug ma-organize sila ug sila ang magmanage sa malata nga basura ila kining livelihood magcreate sila og organic fertilizer.” Dugang pamahayag ni Liga President Gemma Tabada. Nagpasalamat sab si Liga President Tabada sa tabang sa City Agriculture and Veterinary Department nga motabang sa pagmarket sa fertilizer nga mamugna sa asosasyon aron ipanghatag sa nagkadaiyang mag-uuma sa syudad sa Butuan. Giklaro sab ni Liga President Tabada nga magtinabangay ang mga barangay ilabina kalabot sa ekipo nga gamiton sa pagkolekta sa malata nga basura padulong sa nansangpit nga area.