Nanguna ang Lokal nga Panggamhanan sa Butuan sa gipahigayong programa isip pag-obserba sa 81st Araw ng Kagitingan sa Butuan City Library Grounds. Naghalad og buwak ang mga opisyales sa syudad sa Butuan agig pagdumdum sa mga beterano nga nipanaw panahon sa World War II. "A telling evidence of heroism, nationalism, and selflessness all for the fundamental rights and freedom we enjoy at present" mensahe ni 1st District Butuan-Agusan Del Norte Congressman Jose Joboy Aquino II. Dako ang iyang respeto sa gibuhat nga sakripisyo sa mga beterano ug nanghinaut siya nga dili malimtan sa umaabot nga henerasyon ang gibuhat sa mga beterano para sa nasud. Samtang naghatag sab ang Lokal nga Panggamhanan sa Butuan og Award of Merit ug Cash sa 13 ka mga beterano. Usa sa nahatagan si Cresencio Luarez Maligsa nga 80 anyos na karon ug Retired Police Inspector. Nagpasalamat siya sa nadawatan nga pasidungog ug nanghinaut nga kung ugaling mahinayon nga mapatas-an ang ilang benepisyo daku na kini nga tabang alang kanila. Sa mensaheng gipaabot ni Mayor Ronnie Vicente Lagnada pinaagi kang Konsehal Joseph Omar Andaya, ang Day of Valor usa ka bahandi nga dili malimtan sa katawhan. Kung dili tungod kanila dili matagamtaman ang kagawasan ug demokrasya sa nasud. Atol sa programa, anaa ang presensya nila Konsehal Reynante Desiata, Konsehal Eduardo Gonzalez, Liga ng mga Barangay President Kapitan Gemma Tabada, PBGen. Pablo Labra II, Regional Director sa PRO13, Louie Jay Losaria, Head of the Philippine Veterans Affairs Office (PVAO), BGen. Adones Ariel Orio, Commander of 402nd Brigade kauban si LTC Jeffrey Balingao, Col. Jonathan Obena, Group Commander of 15th Regional Community Defense Center (15RCDG), Girl Scout of the Philippines Agusan Council, Boys Scout of the Philippines Agusan Council, DepEd Butuan, Department Heads, DILG-Butuan, CHED-Caraga, ug uban pa.