Mibisita sa Butuan City ang United States Agency for International Development kun USAID-BEACON, miaging semana. Personal silang giabi-abi ni Vice Mayor Lawrence Fortun uban ni City Councilor Cherry May Busa isip Committee Chairperson sa Science and Technology. Gani, gilusad ang Community Network sa tulo ka Sitio sa Barangay Tungao nga gilangkuban sa Sitio Kauswagan, Purok 27-A Sitio San Roque, ug Sitio Tud-ol. Ang nahimong benepisyaryo niini mao ang KM 7 Farmers Produce Cooperative kon KFPC. Adunay sobra sa 2,000 ka miyembro nga mga mag-uuma ang nasangpit nga kooperatiba nga kilangkuban sa mga rebel-returnees ug indigenous communities nga nag produce og bugas, gulay, mais, saging, ug cacao. Lakip usab nga gisudlan sa kooperatiba ang rubber ug falcata plantation, livestock raising, ug vermiculture. Internet Connectivity ang nag-unang rason ngano lisod ang operasyon sa KFPC hilabi na ngadto sa hilit nga lugar tungod walay internet connection. Nakita kini nga problema ni Konsehal Cherry May Busa, Chairwoman sa Committee on Science and Technology rason nga hingpit kini nga nakigtambayayong sa Caraga ICT Council, Kacific Broadband Satellites, hilabi na sa United States Agency for International Development kon USAID. Aron mahatagan sa katumanan ang kakulangon sa internet connection sa komunidad ug sa kooperatiba, nakigtambayayong ang USAID ilawom sa Better Access and Connectivity (BEACON) Project sa Caraga ICT Council ug sa Kacific Broadband Satellites sa pagtukod sa connectivity sa komunidad. Tumong sa inisyatibo nga daghan ang matagaan og Community Networks sa unserved ug underserved areas, nga nag focus sa multi-stakeholder collaboration ug sustainability aron na sa halapad nga internet access ug advance nga economic development. Dakung tabang ang maong Community Networks sa lugar tungod mahimo kining paagi aron ang kooperatiba dali nang maka communicate ug maka responde sa tagsa ka government partners niini nga magtulay sa uban pang proyekto para sa ilang kooperatiba. Mabaligya na usab nila ang ilang mga abot online ug dali na ang pag connect sa mga customers. Duol usab ang Community Network sa eskwelahan nga naghatag og accessible nga internet connection sa mga estudyante, magtutudlo, ginikanan, ug sa mga residente. Ang KFPC ang mag dumala sa Community Network nga usa ka social enterprise kung asa mahulog sila nga “internet reseller” sa lugar pinaagi sa voucher-based system. Labing gikalipay sa Lokal nga Panggamhanan sa pagpanguna ni Butuan City Mayor Ronnie Vicente Lagnada lakip na ang kinatibuk-ang pwersa sa Sangguniang Panlungsod sa pagpanguna ni Vice Mayor Lawrence Fortun ang gibutang nga Community Network sa lugar tungod tabang kini aron mapausbaw ang panginabuhian sa mga miyembro sa kooperatiba lakip na ang mga residente sa komunidad. Atol sa paglusad anaa ang presenya sa LGU-Butuan pinaagi ni Vice Mayor Lawrence Fortun kauban si Konsehal Cherry May Busa, Chairman sa Committee on Science and Technology. Anaa sad ang mga personahe sa USAID’s BEACON, personahe sa Kacific Broadband Satellites, miyembro sa Caraga ICT Council, mga personahe sa Department of Information and Communication Technology - Caraga, ug hilabi na ang mga miyembro sa KFPC.