Nakabaton sa libreng serbisyo ang mga Internally Displaced Persons kon IDP nga nagpasilong sa Libertad Elementary School tungod sa pagbaha miaging semana. Hingpit nga gisiguro sa konseho sa Barangay Libertad sa pagpanguna ni Punong Barangay Menchie Diaz-Rosario nga matagaan og prayoridad ang mga IDP labi na ang mga bata nga adunay sakit sama sa ubo, sip-on, ug hilanat. Gihatag sa gatusan ka mga IDP ang special medical mission, libreng ibot sa ngipon, libreng konsultasyon, ug libreng laboratory test. Lakip usab gihatag kanila ang libreng konsultasyong legal. Daghan usab ka mga IDP ang nakadawat og libreng tambal. Anaa usab ang presensya sa 1501st Ready Reserve Infantry Battalion para sa paghatag sa mga kabataan og libreng gupit sa buhok. Usa si Richele Salon sa mga IDP sa Barangay Libertad. Wala niya gisayang ang higayon sa pagpa check-up sa iyang anak ug sa pagkuha og libreng tambal. “Nagpasalamat ko karon kay naay check-up kay akong anak sige og balik sa hilanat” sumala ni Richele Salon. Nakabalik na sa ilang tagsa ka mga balay ang mga IDP. Gihingusgan sa lokal nga panggamhanan sa Butuan sa pagpanguna ni Mayor Ronnie Vicente Lagnada nga mahatag gilayon sa mga maapektuhan sa kalamidad ang mga serbisyo nga angay para kanila.