Luyo sa kainit sa panahon gilibot sa mga personahe sa Libertad Health District Zone kauban ang Department of Health - Human Resource for Health ang mga barangay ilawom sa distrito niini aron na sa pag kampanya sa Measles-Rubella and Oral Polio Vaccine Supplemental Immunization Activity (MR-OPV SIA). Gisugdan ang aktibidad sa usa flash mob sa Libertad Public Market. Dayong gi-adtuan sa mga personahe ang Barangay Bonbon, Nong-nong, Dulag, Manila De Bugabus, Amparo, San Vicente, Pangabugan, Agao, Urduja, Villa Kananga, ug Bancasi. Nanghatag sila og mga flyers ug nagpasabot sa mga residente mahitungod na sa MR-OPV SIA. Ipahigayon ang Launching sa Chikiting Ligtas MR-OPV SIA karong Mayo 2, sa Robinsons Place Butuan. Ang kampanya molungtad sa tibuok bulan sa Mayo. Giawhag ni Butuan City Mayor Ronnie Vicente Lagnada ang tanang ginikanan sa mga bata nga nag edad 9 months hangtud 5 anyos nga pabakunahan og Measles-Rubella Vaccine ug sa mga bata edad 0 hangtud 5 years old nga papatakan sa Oral Polio Vaccine. Pinaagi niini, masiguro sa syudad nga luwas sa Measles-Rubella ug Polio ang mga kabataan sa Butuan.