Nibisita sa lokal nga panggamhanan sa Butuan si Iligan City Administrator Darwin Manubag alang sa pag benchmark sa mga inisyatibo ni CGB nga pwede niyang mahimong sumbanan sa pagpatuman sa susamang mga programa sa dakbayan sa Iligan. Gi abi abi ni Butuan City Administrator Atty. Joseph Ian Sabado kauban ang mga representante sa City Planning and Development Department, City Human Resource Management Department, City Business Permits and Licensing Department ug City Economic and Business Development Department ang bisita. Gi presentar sa mga nagkadaiyang Departamento ang mga plano ug programa sa CGB alang sa paglagsik sa dakbayan. Partikular nga interesado si Iligan City Administrator Manubag sa mga inisyatibo sa syudad mahitungod sa Rationalization Plan, Solid Waste Management, Water Supply ug Market Operations. Gitinguha usab sa Iligan City nga mahimong certipikado sa ISO 9001:2015 o Quality Management System. Ang Iligan ug Butuan parehas nga mga highly urbanized city sa Mindanao nga kamolong nagpakusog sa mga digital infrastructure ug systems sa pagpangandam nga mamahimong mga Smart Cities. Gipaningkamotan sa CGB, sa pagpanguna ni Mayor Ronnie Vicente Lagnada, ang pakigtambayayong ug pagsuporta sa mga kaubang LGUs alang sa pagpalambo sa matag lokalidad.