Nahimong produktibo ang pagbisita ni City Councilor Cherry May Busa kauban sa iyang legislative team sa University of the Philippines Office of the President Diliman Quezon City, miaging semana. Kini kabahin sa gipahigayong Learning Visit sa UP Film Institute sa Pilipinas aron sayron ang mga best practices sa institusyon. Personal nga gi-abi abi ni UP President Atty. Angelo "Jijil" Jimenez ang grupo nila Konsehal Busa ug gipakita ang mga best practices labi na sa creatives industry sama sa film making ug theater performing arts. Ang pagbisita ni Konsehal Busa dunay kalambigitan sa probisyon sa iyang komitiba nga Science and Technology, Innovation ug ICT Code sa Butuan City nga kasamtangang gipanday niini alang sa pagpalambu sa edukasyon. Kini tungod gitutukan niini ang creative industry ug pagtukod sa mga pasilidad rason nga gitumbok niini nga mahimong sumbanan ang makuhang best practices sa UP. Atol sab sa learning visit gipakita ni UP Film Institute Head Ferdinand Manalo ang mga programa kalabot sa proseso sa film making, video technology ug uban pa. Ang UP Theater naila nga usa ka historic film institute asa dinhi nagikan ang mga primyadong mga aktor, direktor ug mga teknikal nga propesyonal sa nasud. Mapasalamaton si Konsehal Busa sa mga kadagkuan sa UP Diliman tungod sa walay pagduha-duha nga paghatag sa mga impormasyong madala alang sa mga Butuanon.