Miabot na sa kapin onse mil ka mga patigayon sa syudad ang na rehistro na ang business permit pinaagi sa gipahigayong Business One-Stop Shop sa pagpanguna sa City Business Permits and Licensing Department kon CBPLD. Hugtanon na usab nga gipatuman sa CBPLD ang Enhanced Tax Revenue Assessment and Collection System kon E-TRACS. Ang sistema mao ang pag-apply og bag-o nga business permit o mag-renew online. Luyo niini, midagsa gihapon ang mga indibidwal nga nag proseso sa pag renew ug pagkuha og business permits. Usa ang Bookkeeper nga si Rey Segalle nga nalipay sa pagpatuman sa E-TRACS tungod mas gipadali ang pag proseso sa ilang business permit. "Mas napa dali kay pwede raman ka mo apply sa balay. Ang pag renew i-upload ra nimo imong business account number ug last receipt nimo ang gamiton. I-provide nimo sad ang quarterly income tax, i-upload to nimo, kung okay na ila dayon tung i-approved, dali ra." Sumala ni Rey Segalle, Bookkeeper. Base sa datos sa CBPLD anaa na sa 1,045 ang mga patigayon nga bag-ong negosyante sa syudad sa Butuan nga nagkuha og business permit samtang anaa sa 10,267 ang nag renew sa ilang business permit. Mipahimangno ang CBPLD nga kutob karong Biyernes nalang ang BOSS sa Robinson’s Place Butuan, apan magpadayon ang BOSS gikan Pebrero 1 hangtod Marso 31, 2025, sa City Hall sa opisina sa CBPLD.