Niabot na sa 2,958 ka pamilya o 9, 308 ka indibidwal gikan sa bainte uno ka barangay ang apektado sa pagbaha tungod sa pagtaas sa tubig sa Agusan River. Kasamtangan silang nagpasilong karon sa 32 ka evacuation center sa syudad. Usa si Norma Ambayec, 67 anyos nga taga Barangay Mahogany ang mibakwit ug anaa karon sa Butuan Central Elementary School. Adlawng Domingo siya mihawa sa ilang balay. Sumala niya, mi desisyon na sila og hawa tungod taas na ang tubig sulod sa ilang balay. "Kami nalang ang nagpabilin kay taas man lage ang among balay, kumpyansa mi kay basin dili ra maka abot, karon kay mitubo man siya, lisud naman mi maka naug hinuon" Sumala ni Norma Ambayec. Nagpahigayon sa koordinasyon ang City Social Welfare and Development Department kon CSWDD sa Department of Social Welfare and Development kon DSWD aron na sa dugang nga tabang sa mga apektadong pamilya nga naa sa evacuation center. Dunay food assistance nga gihatag sa mga apektado gikan sa DSWD. Gisuguro sa CSWDD kauban ang DSWD nga padayon ang pag-abot sa tabang hilabi na nga padayon pud ang pag abot sa mga evacuees sa mga nagkadaiyang evacuation center. Gitaho sab nga adunay mga evacuees nga nagka sakit sama sa ubo, sip-on, sakit sa ulo, hilanat, ug uban pa apan dali gilayon kini gihatagan og aksyon. "Every evacuation center, naay mga Barangay Health Worker nga gi assign ang mga Barangay. So along with that naay mga health worker from DOH nga nag conduct og roving sa mga Evacuation Center inkaso nga naay mga reported sa mga evacution center nga nag kinahanglan og medical attention,” sumala ni Vin Udtohan, CSWDD PPAD Unit Head. Padayon karon ang monitoring labina sa mga evacuees lakip sab ang pagbantay sa pagsaka sa tubig sa syudad.