Gi-aprobahan na sa mga miyembro sa Sangguniang Panlungsod ang SP Resolution No. 168-2023 isip pag-ila ug pagdayeg sa kaisog ug dedikasyon nila Lovel Calipusan ug Ronald Torregosa nga mihatag sa impormasyon ug mireport sa pinakaduol nga police station sa nahitabong pagpanulis sa Purok 6 Barangay Ampayon ning syudad. Tungod niini, malampuson ug dali nga nasikop ang upat ka mga suspetsado nga bitbit ang 970,000.00 pesos didto sa Barangay Tiniwisan sa pagpangusog sa mga personahe sa Butuan City Police Station 4. Sumala sa mga miyembro sa SP sa pagpanguna ni City Councilor Cromwell Nortega angayan lamang pasalamatan ug ilhon ang dakong kontribusyon nila Calipusan ug Torregosa nga walay kahadlok sa gihimong aksyon aron daling masikop ang mga tulisan. Nanghinaut ang mga miyembro sa SP nga himuong sumbanan ang gihimong kaisog sa duha ka indibidwal ug ireport gilayon sa otoridad ang mamatikdang krimen sa palibot alang sa mas hapsay ug luwas nga syudad sa Butuan. Gipangunahan ang pagpangamahanan sa SP ni City Councilor Cromwell Nortega uban sa tibook pwersa sa Sangguniang Panlungsod sa pagdumala ni Vice Mayor Lawrence Fortun.