Sa gihimung Exit Conference sa 24th National Gawad KALASAG Validation sa Balanghai Hotel and Convention kagahapon, gidayeg sa mga validators ang inisyatibo ug lakang nga gibuhat sa City Disaster Risk Reduction and Management Department-All-Hazards Incident Management Action Response Team kun CDRRMD-ALIMAT. Usa sa ilang gi-komenda ang pag cluster sa 86 ka Barangay sa syudad lakip na ang pag identify sa danger zone sa mga Barangay kung aha ang bahaon nga lugar, landslide prone, vehicular accidents, ug uban pa para mas mapadali ang paghatag og responde panahon sa emerhensiya. Gawas niini, nihatag sab sila og pipila ka suhestyon para plastar ug dunay quality standard ang pagbuhat sa ilang mga reports. Mapasalamaton si CDRRMD Head Mark July Yap sa presensya sa mga validators tungod nahatagan na sab og tsansa ang CDRRMD nga mapakita ang mga best practices sa ilang buhatan para masiguro nga luwas ang katawhan sa syudad. Gawas niini, mapasalamaton siya sa mga suhestyon nga gihatag para ma plastar ang ilang mga dokumento, madungagan pa ilang kahibalo nga makatabang para mapanindot ang pag hatag serbisyo sa katawhan, ug uban pa. Kini ang ikaduhang higayon nga na-apil ang CDRRMD-ALIMAT sa National Gawad KALASAG ilawom sa GEMS Category.