Malipayon nga gidawat ni City Library Head Jessica Clarito ang mga kinarton nga libro nga gidonar sa Indigenous People of Caraga Foundation Inc. nga gipangunahan ni Forester Zaldy Calderon Perater, President. Alang kang Clarito, daku na kini og tabang ang mga libro nga gidonar nila para mas daghan nga kliyente ang maka benepisyo labi na ang mga estudyante lakip na ang mga tawo nga hilig mo basa og libro. Ang mga libro gilangkuban sa mga sci-fi, novels, romance, mystery, cooking book, story book ug uban pa nga makahatag og dugang kahibalo sa mga mobasa. Sumala ni Forester Perater nga gipili nila ang Butuan City Library nga hatagan og libro tungod abli ang buhatan para sa tanan ug masiguro nga ma cater ang 86 ka Barangay sa syudad sa Butuan lakip na nga ma sustain kini tungod dunay mag maintain nga mga empleyado. Ang mga gipang donar nga libro gikan pa sa New Jersey nga giplastar ni Mrs. Luzviminda Matugas Monares kauban ang iyang tulo ka anak. Naghatag sab og Certificate of Appreciation ang Butuan City Library sa foundation isip pasalamat sa inisyatibo nga mag hatag og mga libro kanila. Ang Indigenous People of Caraga Foundation Inc., usa ka Non-government organization ug tinguha niini ang paghatag ug pagtabang sa mga tawo dinhi sa syudad ug sa tibouk rehiyon sa Caraga.