Nakadawat og insentibo ang ika-28 nga Centenarian sa Butuan gikan sa lokal nga panggamhanan sa Butuan. Gidawat ni Medianera Uy ang Certificate of Recognition ug cheque nga nagkantidad sa 50,000 pesos gikan sa Lokal nga Panggamhanan sa Butuan pinaagi sa City Social Welfare and Development Office ug Office of the Senior Citizen Affairs. Ang insentibo subay na sa SP Ordinance No. 4757-2015 o An Ordinance Establishing the Centenarian Award to Qualified Citizens in the City of Butuan and Providing Benefit and Funds thereof. Sa mensahe nga gipaabot ni Congressman Jose “Joboy” Aquino II, pinaagi kang ni Atty. William Christian Dela Cruz malipayon siya tungod niabot sa edad nga 100 years old si Nanay Medianera. Indikasyon kini nga ang ilang pamilya dunay pagmahal ug pag amuma sa katiguwangan. Si nanay Medianera nag 100 years old niadtong Mayo 31. Ug adtong ikaduhang semana sa Hunyo nadawat niya ang 100,000 pesos gikan sa Department of Social Welfare and Development. Ang nadawatan nga insentibo ni Nanay Medianera padulong sa iyang maintenance ug uban pa nga panginahanglanon. Ang Lokal nga Panggamhanan sa Butuan nalipay tungod nagkadaghan ang centenarian awardee sa syudad ug pinaagi sa SP Ordinance No. 4757-2015 nahatagan og suporta ang mga centenarian.