Midonar og dugo ang gatusan ka mga indibidwal atol sa natigayong Mass Blood Donation Drive sa World Blood Donor Day, sa may Robinson’s Place Butuan, adlawng Biyernes. Ang kalihokan subay sa temang “20 Years of Celebrating Giving: Thank You Blood Donors!” nga nagtan-aw sa dakung papel sa mga blood donors nga mitabang sa mga nanginahanglan og dugo. Daghan ang midonar og dugo sa gipahigayong kalihukan sama sa Philippine National Police, personahe sa mga ahensya, ug mga kliyente sa Robinson’s Place Butuan. Gitagana ang kada Hunyo katorse matag tuig isaulog ang World Blood Donor Day. Kini base sa gipagawas sa World Health Organization kon WHO og ika Fifty-Eight World Health Assembly Resolution o ang “Blood Safety: Proposal to Establish World Blood Donor Day”, tuig 2005. Ang kalihukan nahimong posible tungod sa lokal nga panggamhanan pinaagi sa City Health Health Department kauban ang Philippine Red Cross Butuan-Agusan del Norte Chapter ug Department of Health - Caraga.