Pormal nga gitunol ni Konsehal Cherry May Busa ang birth certificate sa mga benepisyaryo atol sa Culmination Program sa Civil Registration Month ug Distribution sa Certificate of Live Birth to the Beneficiaries of Birth Registration Assistance Project kun BRAP, sa Cityhall Lobby, Pebrero 27. Alang kang Jhonalyn Miel nga taga Barangay Pangabugan, daku og tabang ang libre nga programa sa City Civil Registry Department ug Philippine Statistics Authority aron marehistro ang mga indibidwal nga wala pa na rehistro ug makabaton og dokumento ang mga sama kanila nga nag lisud sa kinabuhi. Ang BRAP usa ka proyekto sa PSA nga gihingusgan pinaagi sa lokal nga panggamhanan sa Butuan pinaagi sa CCRD aron motaas ang porsyento sa civil registration labi na sa marginalized sector. Sa mensahe nga gipaabot ni Vice Mayor Lawrence Lemuel Fortun pinaagi ni Konsehal Cherry May Busa, doul sa opisyal ang programa tungod nakita niya ang kalisud sa mga tao nga walay birth certificate. Kung walay birth certificate ang usa ka indibidwal, wala sab kiniy makuha nga benepisyo gikan sa gobyerno tungod wala man kini na rehistro. Gani, usa ang opisyal sa nag lihok sa Civil Registration Reform Bill dihang Kongresista pa siya. Daku lamang iyang kalipay tungod daghan nga inisyatibo ang gibuhat sa PSA ug CCRD para masiguro nga tanan nga Butuanon ang makabaton og birth certificate. Anaa sa aktibidad sila Acting City Civil Registrar Head Cresencio Bermudez Jr., ug PSA Agusan del Norte Chief Statistical Officer Renelo Magno.