Gipresenta sa mga kooperatiba sa dakbayan ang Final Strategic Plan atol sa natigayong City Cooperative Development Council Meeting sa Lime and Zest, Watergate sa Butuan City, adlawng Miyerkules. Gipangunahan kini sa City Cooperative Development Office asa gi presenta ni Winston Salvador, Operation Director Propegemus Incorporated ang 5-year Strategic Plan alang sa kalambuan sa mga kooperatiba. Sa gihimong pagpulong, gipahayag ni Cooperative Development Authority Anecita Unson nga palig-onon ang Guidelines sa structure, organization ug operation sa mga Cooperative Development Council. Tumong niini nga magiyahan ang mga kooperatiba ug mahatag ang gikinahanglang suporta sa paglambo niini. Gipa-ambit usab ni Department of Trade and Industry P3 Provincial Coordinator sa Agusan Del Norte Juniel Paran ang mahitungod sa P3 Pundo sa Pagbabago at Pag-asenso sa mga kooperatiba. "Gi design ni siya para makapahulam sa atong mga micro enterprises borrowers with asset size not exceeding 3 million and not more than 2.5 % per month interest rate,” sumala ni Juniel Paran. Dugang pa niya, ang P3 Wholesale Program, Micro Finance o Partner Financial Institutions mamahimong mapahimuslan asa ang mga micro-enterprises pwedeng makahulam gikan sa nasangpit nga pundo. Aron matabangan ug mapasabot ang mga pangutana ug concern sa mga kooperatiba, andam nga mitubag si Cooperative Development Specialist II Ms Gezzel Quaiao aron mahatagan og katin-awan ang ilang mga concern. Daku ang pasalamat sa City Cooperative Development Office sa dakung suporta sa Lokal nga Panggamhanan sa pagpanguna ni Mayor Ronnie Vicente Lagnada ug sa City Development Authority aron sa pagpalambo sa mga kooperatiba sa dakbayan.