Aktwal nga nadawat sa 1,165 Rice Farmers sa syudad sa Butuan ang sinakong abono pinaagi sa fertilizer discount voucher distribution nga gipahigayon kagahapon sa Barangay Baan Km.3 ning syudad. Kini nagkantidad sa tag 6,300 pesos kada ektarya. Daku ang pasalamat sa usa ka mag-uuma nga si Felixberto Almendras lumulupyo sa Barangay Bitan-agan ning syudad human nakadawat siya sa duha ka sako ug tunga sa abono tungod dako na kining tabang kaniya nga makaminos sa gasto. “Pasalamat kog daku sa atong gobyerno nga nakahatag kanamo og ayuda nga makahatag og kadasig kanamong mga mag-uuma dinhi sa Bitan-agan. Salamat kaayo aning abono nga makapatambok sa among tanum medyo daku daku na among abot karon tungod medyo maayo ang dagan sa among panguma ug sa suporta sa atong gobyerno.”sumala ni Felixberto Almendras. Gipaniguro usab nila City Councilor Arturo Gado ug liga ng mga barangay President Gemma Tabada sa mga mag-uuma nga anaa kanunay ug andam musuporta ang city government sa Butuan sa sektor sa agrikultura sa syudad asa hugtanung gitutukan ni Mayor Ronnie Vicente Lagnada pinaagi usab sa pag-abag sa DA ug uban pang ahensya aron sa pagpadako sa produktong agrikultura sa ingon dili na muangkat sa laing dapit. Ang mga mag-uuma nga makadawat sa abono ug uban pang suporta gikan sa city government sa Butuan ug DA-Caraga mao ang mga mag-uuma nga myembro sa asosasyon o kooperatiba ug rehistrado sa Registry System for the Basic Sectors in Agriculture kun RSBSA. Ang distribusyon gipangunahan sa City Agriculturist Office ug Department of Agriculture Caraga uban nila City Councilor Arturo Gado, Committee Chair on agriculture, fisheries ug agro-forestry ug Liga ng mga Barangay President Gemma Tabada.