Gilusad ang Farm Business School kun FBS sa DARBECO Office sa Purok 5 Barangay De Oro syudad sa Butuan miaging semana. Kini subay sa pinirmahay sa Memorandum of Agreement sa mga nagkadaiyang ahensya sa gobyerno asa nahimong benipisyaryo ang De Oro Agrarian Reform Beneficiaries Cooperative o DARBECO sa Barangay De Oro. Ang natigayong pinirmahay sa MOA subay sa giaprobahang SP Resolution no. 278-2023 sa mga miyembro sa Sangguniang Panlungsod sa pagpanguna ni Vice Mayor Lawrence Fortun. Gidasig sa mga opisyales sa nasangpit nga mga ahensya ang tanang benipisyaryo o miyembro sa DARBECO nga magtinabangay aron magmalungtaron ang proyekto. Taas ang plano ug panglantaw sa nasangpit nga mga ahensya alang sa mga myembro sa DARBECO nga mahimo usab kining mga negosyante gumikan sa kaugalingong produkto. Andam sab ang ATI, DTI ug lokal nga panggamhanan sa Butuan nga mohatag og technical trainings aron mas mapalawman pa ang kaalam sa mga miyembro. Subay niini, mipaabot sa dakung pasalamat si Evangeline Magtibay, DARBECO Chairperson sa tanang nagpaluyo sa proyekto uban sa panghinaut nga magmalahutayon kini tungod usa kini sa tinubdan padulong sa pagpalambo sa kahimtang sa mga mag-uuma sa barangay De Oro. Gulay ang nag unang produkto sa DARBECO ug usa kini sa mikometar nga mo supply og gulay sa Agriboost Project nga usa sa gitutukan ni Mayor Ronnie Vicente Lagnada hinungdan dakong tabang nga mabansay ang mga mag-uuma pinaagi sa FBS aron makamugna kini og mga produktong makakompetensya sa laing dapit ug aron sab mutaas ang kita sa mga mag-uuma. Nagmalampuson ang kalihukan sa pagtinabangay sa Department of Agrarian Reform Provincial Office- Agusan del Norte, DA-Agricultural Training Institute-Caraga, Department of Trade and Industry-Agusan del Norte, DARBECO Office ug LGU Butuan sa pagpanguna ni Mayor Ronnie Vicente Lagnada nga girepresentahan ni City Councilor Joseph Omar Andaya.