Gidawat ni CDRRMO OIC Mark July Yap ang duha ka pasidungog atol sa natigayong Regional Gawad KALASAG Seal for Local Government Units-Local DRRM Councils/Offices for Calendar 2023 sa Inland Resort and Convention Hall, Agosto 14. Nasakmit sa LGU Butuan pinaagi sa CDRRMO All-Hazard Local Incident Management Action Team kun ALIMAT ang 1st place sa kategoryang Government Emergency Management and Response Team kun GEMS ug Beyond Compliant ang CDRRMO sa Regional Gawad KALASAG 2023. Sumala ni CDRRMO OIC Mark July Yap, gisukod sa Gawad KALASAG ang ka resilient sa CDRRMO sa upat ka thematic areas nga gilangkuban sa Disaster Preparedness, Disaster Prevention and Mitigation, Disaster Response, and Disaster Rehabilitation and Recovery nga maoy nahimong basehan. Kahinumduman nga miagi sa makuti nga validation ang buhatan sa CDRRMO bulan sa Hunyo alang sa kategoryang GEMS. Duha ka lakang sa validation ang naagian sa buhatan, una ang table top, diin gi tagsa-tagsa ang mga paperworks lakip ang ilang pamaagi sa pag responde. Ikaduha ang field validation, asa gibisita sa validators ang CDRRMO Riverbase ug ang Command Center nga padayon ang konstruksyon. Ang nakuha nga award sa Lokal nga Panggamhanan sa Butuan City sa pagpanguna ni Mayor Ronnie Vicente Lagnada pinaagi sa CDRRMO usa ka dako nga dungog tungod nagpakita kini nga resilient ug proactive ang disaster response sa syudad. Dako kini nga hagit sa CDRRMO sa paagi nga kinahanglan nila kini isustenar o kaha palabwan pa. Tungod niini nga kalampusan kwalipikado ang Butuan City sa National nga Gawad KALASAG 2023 nga gipangandaman karon sa nasangpit nga buhatan.