Daghan ang niapas sa pagparehistro sa nabiling duha ka adlaw sa libreng late birth registration nga gipahigayon sa City Civil Registrar Office sa City Hall Building. Usa si Sarah Cagampang nga nakapahimulos sa libreng late birth registration. Wala niya gisayangan ang oportunidad aron ma rehistro na iyang unom ka bulan nga anak. Daku iyang pasalamat sa Lokal nga Panggamhanan sa Butuan sa libreng usa ka bulan nga pagparehistro ug nanghinaut nga duna pay susama niini nga aktibidad ug daghan pa ang mas matabangan. Si Cagampang taga Barangay Cabcabon ning syudad. Sa inisyal nga taho sa Civil Registrar anaa na sa 378 ka indibidwal ang naka pahimulos sa libreng late birth registration ug gilauman nga mo taas pa kini kung mahuman na ang 10 days mandatory posting sa mga papel. Gi-awhag ni CCRO Head Amalia Que ang katawhan sa pag apas ug pagparehistro tungod kutob na lang ugmang adlawa ang libreng late birth registration. Ang libreng late birth registration nag sugod niadtong Pebrero 1, 2023. Ug matag Pebrero kini nga aktibidad ilawom na sa SP Ordinance No. 4427-2014 o "An Ordinance declaring February of every year as free Birth Registration Month in the City of Butuan and for other purposes."