Nahilakip sa delegasyon ni Pangulong Ferdinand Marcos Jr sa Japan si Butuan City Mayor Ronnie Vicente Lagnada ug 1st District Representative Jose Aquino II. Ang duha ka opisyal apil sa natigayong meeting tali ni President Ferdinand Marcos Jr. ug Japan International Cooperation Agency (JICA) President Dr. Tanaka Akihiko adlawng Biyernes. Sa meeting mipasalig ang JICA nga magpadayon ang ilang suporta sa Pilipinas labina sa mga proyektong pangkalambuan. Ang JICA ang pinakadakung bilateral aid agency sa kalibutan ug usa sa leading partner sa Pilipinas sa socioeconomic development. Ang state visit ni Pangulong Marcos sa Japan gilantaw nga makahatag og dakung impact sa pagpalambo sa ekonomiya ug mutual defense labi pa nga daan ng gi anunsyo sa Department of Foreign Affairs nga pito ka bilateral deals ang pirmahan sa duha ka gobyerno. Gawas sa imprastraktura ug defense, duna sab kasabutan mahitungod sa agriculture and information ug communications technology. Duna usab diskusyon mahitungod sa Mindanao Development Plan. Ang nasangpit nga pagbisita sa mga opisyal sa Japan daku og ikatabang labina sa Butuan City nga aduna nay kasamtangang koneksyon sa JICA.