Nakadawat na sa ilang centenarian incentives ang duha ka centenarian nga sila Pacita Dumanon nga taga Barangay Agusan Pequeno ug Mercedes Calo nga taga Barangay Rajah Soliman ning syudad miaging semana. Gikan ang insentibo sa LGU-Butuan ug Department of Social Welfare and Development Office kon DSWD. Gihatag sa ila ang Centenarian Certificate of Award ug ang centenarian incentives nga nag kantidad og 50,000 pesos gikan sa LGU-Butuan ug 100,000 pesos gikan sa DSWD. Ang nasangpit nga pasidungog subay sa SP Ordinance No. 4757-2015 o An Ordinance Establishing the Centenarian Award to Qualified Citizens in the City of Butuan and Providing Benefits and Funds Thereof ug ang Republic Act 10868 o Centenarian Act of 2016. Daku ang pasalamat sa mga centenarians sa Ginoo sa taas nga kinabuhi nga gihatag kanila. Gikalipay ni Butuan City Mayor Ronnie Vicente Lagnada ang taas nga edad nga nakab-ot sa mga centenarians sa syudad. Pinaagi sa maong programa nahatagan og importansya ang mga susama nila Dumanon ug Calo nga dako ang nahatag usab nga kontribusyon sa syudad sa ilang mga nahimong trabaho kaniadto.