Nakabaton og Digital Literacy Training Series ang nagkadaiyang trabahante sa LGU-Butuan kalabot na sa Computer Fundamentals and Working Tool Application, adlawng Huwebes, sa Butuan City Library, ning syudad. Ang pagbansay gipangunahan sa City Human Resource Management Office katambayayong ang City Information and Communications Technology Office. Pinaagi niini, mas mapa usbaw ang skills ug mahimong mas produktibo ang mga empleyado sa paghuman sa trabaho. Igo na ang oras nga igahin sa mga personahe sa ilang trabaho tungod dali nalang kanila ang digital knowledge. Namugna ang training tungod sa gipahigayong survey sa mga learning needs assessment o ang mga kinahanglang i-improve sa mga personahe sa matag opisina. Hagit sa CHRMO ug CICTO ang kakulangon sa pagkahibalo sa digital literacy sa ubang empleyado. Ang Digital Literacy Training Series usa ka step by step nga proseso gikan sa fundamental level hangtud na sa advance level. Ang tinguha niini mao na ang pag capacitate sa mga personahe aron mahimong digitally aware ug digitally skilled na sila. Gihatag kanila ang Microsoft Productivity Tools sama sa Microsoft Word, Microsoft Excel, ug Powerpoint. Adunay 100 target participants sa nasangpit nga pagbansay nga gitunga sa lima ka batch asa adunay baynte ka personahe ang bansayon kada batch. Buot ni Mayor Ronnie Vicente Lagnada nga lakip nga mahatag sa mga personahe sa LGU-Butuan ang igong mga skills nga magamit nila sa ilang matag trabaho aron muresulta sa mas episyente nga pagpanerbisyo sa mga katawhan.