Gihangyo sa DepEd Butuan Division sa pagpanguna ni School Division Superintendent Minerva Albis Ph.D ang tanang ahensya, sector ingon man ang komunidad nga magtinabangay sa pag abli sa klase karong Agosto 29. Kini atol sa gipahigayong 2023 Oplan Balik Eskwela Conference kagahapon sa Grand Palace Hotel nga gisuportahan sa mga kadagkuan sa Butuan City Police Office ug PRO 13 uban ni Atty. William Christian Dela Cruz isip representante ni Congressman Jose Aquino II, pipila sa mga personahe sa lokal nga panggamhanan sa Butuan, DPWH, BCWD, Transport sector, stakeholders ug media partners. Sa conference mipasalig ang BCPO ug PRO 13 nga pahugtan ang seguridad sa tanan pinaagi sa pagdeploy sa kapulisan sa palibot sa mga tulunghaan ug uban pang area sa syudad uban sa LTTMO nga modumala sa traffic situation ilabina sa mga tulunghaan nga huot ang dagan sa trapiko. Gipresentar sab sa DepEd Butuan ang nag-unang gipatumang mga programa apil na ang mga on-going projects asa gikinahanglan ang suporta niini sa lokal nga panggamhanan sa Butuan ug national government. Gihangyo sab sa DepEd Butuan ang suporta sa mga ginikanan ilabina ang pagdisiplina ug padayunon ang paghatag og giya sa mga anak sa pagtuon ug dili lamang kini isalig sa mga magtutudlo.