Nanguna ang Caraga State University sa rehiyon Caraga ug ika-48 sa entiro Pilipinas sa 367 ka Higher Education Institutions kun HEIs. Kini base sa gipagawas nga Webometrics July 2023 publication sa Ranking of World Universities pinaagi sa Cybermetrics Lab. Ang Webometrics usa sa inisyatibo sa Cybermetrics Lab nga dakong grupo sa research sa Spain nga anaa sa Consenjo Superior de Investigaciones Cientificas kun CSIC. Ang Caraga State University ang nag inusarang HEI sa Caraga nga naapil sa Top 100. Gawas sa CSU, nahilakip sab sa Top Universities sa rehiyon ang Father Saturnino Urios University (rank 197), Surigao del Norte State University (rank 213), North Eastern Mindanao State University formerly known as Surigao del Sur State University (rank 215), Saint Joseph Institute of Technology (rank 220), St. Paul University- Surigao (rank 248), Agusan del Sur College (rank 305), Southway College of Technology (rank 331), ACLC College of Butuan (rank 351), ug Holy Child Colleges of Butuan (rank 360). Mipaabot sa pagtimbaya ang lokal nga panggamhanan sa Butuan sa pagpanguna ni Mayor Ronnie Vicente Lagnada sa kalampusang nakab-ot sa mga tunghaan sa dakbayan.