Nagpatawag og Coordination Meeting si Congressman Jose Aquino II nga girepresentahan ni City Councilor Vincent Rizal Rosario kagahapon alang sa paghisgut sa pagpangandam sa Panaad 2023 sa Barangay Anticala sa Biyernes Santo, Abril 7. Nahisgutan dinhi ang pagdumala sa deployment plan, seguridad ug mga pick-up point sa mga deboto, traffic management plan, detour plan sa tulay sa may Barangay Pianing nga on-going ang repair, road clearing ug lighting sa dapit asa magsugod ang prosesyon, logistical support, after care support ug uban pa. Dunay ideploy nga mga personahe gikan sa pwersa sa kapulisan ug kasundaluhan. Duna sab mga bus alang sa libreng sakay sa mga deboto nga magsugod ang pick-up point sa Barangay Libertad overpass, Guingona Park, Barangay Baan KM.3 duol sa 7/11, Barangay Ampayon Rotunda ug Barangay Taguibo crossing. Mi-abiso sab ang mga opisyal nga gidili ang pagdala og back pack, dili sab ubanon ang mga bata ubos sa pito ka tuig ug pagsuot og heels o sandals sa tanang mosalmot sa Panaad 2023 aron masiguro ang seguridad sa tanan. Anaa sa Coordination Meeting sila Roy Serdeňa, Assistant City Administrator ug Jay Rivero sa Congressman’s Office, mga Station Commander ug personnel sa Butuan City Police Office, Land Transportation Traffic Management Office, City Engineers Office, CENRO, CGSO, BFP, CHO-City Nutrition Division, DPWH-BCDEO, ANECO, BCWD, Jay Rivero (Congressman’s Office Focal Person) ug Panaad organizer.