Nagmalampuson ang natigayong Sto.Nino Higante-Higante Competition sa Sto.Nino Shrine kagahapon. Walo ka contingent ang nagtigi sa kompetisyon asa gipakita ang tagsa-tagsang desinyo ug unique nga obra sa imahe sa Sto Niňo pinaagi sa pinasahi nga kompetisyon tungod gihimong higante ang mga imahe. Gideklarang First Place ang contingent no. 1 gikan sa Purok-2 Libertad nga nakadawat og cash prize nga 50,000 pesos, Second Place ang Contingent no. 9 sa Khapeteren Purok 2 Libertad nga nakadawat og cash prize nga 30,000 pesos ug Third Place ang Contingent no. 4 gikan sa SFC Libertad nga nakadawat og cash prize nga 20,000 pesos. Samtang nakadawat og tag 10,000 pesos isip consolation prize ang lima ka contingent nga gilangkuban sa contingent no.3 San Antonio De Padua Chapel – Damayan, no.5 sa Fisher Folk Damayan, no.6 CCRS- Catholic Charismatic Renewal Services, no.7 sa Knights of Columbus Sta Cruz Council # 1701 ug ang no.8 ISKP Chapel Dumalagan. Nagpasalamat ang pamunuan sa Sto Niňo Diocesan Shrine sa Barangay Libertad ning syudad sa Butuan sa hugot nga suporta ni Mayor Ronnie Vicente C. Lagnada sa kalihukan sa simbahan pinaagi sa City Tourism Office. Suportado sab sa PNP, Philippine Army, CDRRMO, Philippine Red Cross Butuan-Agusan del Norte Chapter ug LTTMO ang aktibidad.