Gi-aprobahan na ni City Mayor Ronnie Vicente Lagnada ang City Ordinance no. 7212-2025 o ang ordinansa nga paghatag og relief o amnestiya sa bayad sa surcharges ug interest sa lokal nga buhis sa pagbalhin sa pangalan o ownership sa mga real property ngadto sa mga manununod o heirs. Kini nga ordinansa mas naila nga Butuan City Tax Relief on Surcharges and Interests on Local Estate Transfer Tax Ordinance. Sa Section 2 sa ordinansa nakalatid dinhi nga maka avail niini nga amnestiya ang mga manununod o heirs kung namatay ang mismong tag iya sa kabtangan sa dili pa muabot o sa mismong adlaw sa Mayo 31,2022. Samtang sa Section 3 sa ordinansa nakalatid sab dinhi nga kutob lamang Hunyo 14 tuig 2025 ma-avail ang amnestiya. Sumala ni City Councilor John Gil Unay nakita ni Mayor Ronnie Vicente Lagnada, Vice Mayor Lawrence Fortun ug SP members ang panginahanglan sa katawhan sa Butuan mahitungod sa mga obligasyon sa estate tax rason nga nagkahiusa kini aron matabangan ang katawhan nga mamenusan ang bayrunon niini sa estate tax. “Ang ordinansa nagrequire nga ipakita ang certificate of death sa tag-iya sa yuta. Ipresenta kini pero kinahanglan gikan sa PSA certified true copy sa original,” sumala ni Konsehal John Gil Unay. Dugang pa niini, ang mag champion o manguna sa pagpatuman sa ordinansa mao ang City Treasury Department uban sa City Assessment Services Department sa LGU Butuan. “Tagaan ka og computation sa City Treasury Department kung pila lang ang mabayran nimo kay base sa National Law naa man didto ang mga nagkadaiyang benepisyo sa property owners aron mabayran ma clear sila sa estate tax obligation hopefully ang atong mga ka igsoonan sa 86 ka barangay maka-avail niini,” dugang pamahayag ni Konsehal John Gil Unay. Sumala sa balaod nga ayha mabalhin sa pangalan sa heirs o manununod ang ngalan sa kabtangan kung cleared na ang obligasyon sa estate tax rason nga mas gipagaan kini sa tibook pwersa sa city government sa Butuan ug ipatuman ang amnestiya. Kini nga ordinansa pinasubay sa August 5,2023 RA no. 11956 o ang pag amyenda sa Republic Act no. 11213 o mas naila sa Tax Amnesty Act isip pag amyenda sa Republic Act no. 11569 pinaagi sa paghatag og lugway sa availment sa estate tax amnesty hangtud Hunyo 14,2025.