Girekomenda sa mga auditors gikan sa TUV NORD Philippines Inc. nga mahatagan ang City Government of Butuan og Certificate sa ISO 9001:2015. Kini atol sa natigayong closing meeting human ang tulo ka adlaw nga gipahigayong audit sa tanang buhatan sa city government sa Butuan. Tungod niini, daku ang kalipay ug pasalamat ni Mayor Ronnie Vicente Lagnada sa gipakitang kooperasyon ug pagsunod sa direktiba sa tanang Department Head uban ni City Administrator Atty. Joseph Ian Sabado ug QMS Leader Atty. Noel Ephraim Antigua aron makuha ang certificate. Importante kini nga makuha sa City Government sa Butuan alang sa pagpatuman sa quality management system tungod mao kini ang basehan aron mahatag ang kalidad ug standard nga serbisyo sa syudad. Daku usab ang kalipay sa mga konsehales nga sila Cherry May Busa, Eduardo Gonzalez, Rey Desiata, Joseph Omar Andaya ug Gemma Tabada tungod sa kalampusang nakab-ot sa city government sa Butuan sa pinaka unang audit alang sa ISO certificate. Subay sa nakab-ot nga kalampusan sa city government sa Butuan gipahinumduman sa mga Auditors ang mga Department Heads nga ipadayon ang pagpatuman sa management system pinaagi sa internal auditing system, ipabilin ang pagfocus sa legal ug maayong customer service ug mamahimong positibo sa mga kabag-uhan sa sistema. Nakatakda na usab ang laing pagpahigayon sa audit sunod tuig bulan sa Pebrero aron masuta kung namintinar ang pagsunod ug paghatag sa quality management system.