Nagmalampuson ang natigayong Caraga Pride Parade 2023 sa dakbayan sa Butuan, Biyernes agig pagselebrar sa LGBTQ+ Month. Nagsuot og mga makulay nga mga costumes ang pipila ka miyembro sa LGBTQ+ nga miapil sa parade libot sa mga nag unang kadalanan sa Butuan diretso sa SM City Butuan alang sa program. Gipangunahan kini sa Commission on Human Rights - Caraga, kauban ang City Population Office, ug Commission on Population Development asa gisalmutan sa mga LGBTQ Members gikan sa managlahing barangay sa syudad ug ang mga kasikbit nga lugar sa Butuan City. Ang Presidente sa GLOW CBR ug Vice President sa GARBO Agusan nga si Angel Legaspi wala gisayang ang higayon og misalmot sa Caraga Pride Parade. Alang niya ang ingon ani nga aktibidad maghatag og kadasig sa miyembro sa LGBTQ+ og oportunidad sa pag edukar sa katawhan kung unsa sila lakip na ilang katungod sa komunidad. Daku iyang pasalamat sa lakang aron mahinayon ug mapatuman kini sa matag tuig tungod pinaagi niini mamenusan na ang pang tamay ug diskriminasyon kanila. Gibida sa lima ka partisipante ang ilang costume atol sa Mardi Gras Outfit Presentation ug silang lima nakadawat og token isip pag partisipar sa maong aktibidad. Alang sab kang George Cahapay nga residente sa Barangay San Vicente nga nag una ang pagpang bully nga ilang nasinatian isip mga miyembro sa LGBTQ+. Apan gipasigarbo niini nga sa ilang Barangay protektado ang mga LGBTQ+. Kung duna may mahitabong pagpang bully husayon kini sa barangay aron mahatagan sa aksyon ang dili maayong pagtratar kanila. Gawas niini, gilusad sab ang Model Comprehensive Anti-Discrimination Ordinance asa gibuhat para ma proteksyonan ang katungod sa mga LGBTQ+ lakip na batok sa bisan unsa nga porma sa diskriminasyon.