Gitugutan ug gihatag sa tibook pwersa sa Sangguniang Panlungsod members ang posisyon nga mamahimo nga temporaryong presiding officer sa 13th regular session sa SP si Butuan City SK Federation President Cynth Zephanee Nietes adlawng Martes isip kabahin sa selebrasyon sa Womens Month miaging bulan. Kini usa na sa tradisyon sa SP sa pagpakita og dakung pagtahod ug paghatag importansya sa mga kababayen-an sa nahimung kontribusyon nila sa komunidad ug pamilya apil na ang paghatag og panahon nga mopakita sa ilang talagsaong abilidad sa bisan asang aspeto. Subay niini, nanguna sa hisgutanan sa session ang unang pagbasa sa giduso nga ordinansa nga naglangkub sa 2023 annual budget sa mga barangay, pag aprobar sa mga aplikasyon sa prangkisa ug lisensya sa mga motorized tricycle-for hire, paghisgut sa revenue code sa mga barangay, paghisgut sa mga giduso nga ordinansa ug resolusyon sa komitiba sa good government, transportasyon, tourism ug uban pa. Gipaningkamutan sa Butuan SP sa pagdumala ni Vice Mayor Lawrence Fortun nga makapanday og mga balaodnon nga haum sa mga panginahanglanon sa katawhan alang sa paspas nga implementasyon sa mga programa ug proyekto nga subay sa plano ug direktiba ni Mayor Ronnie Vicente Lagnada.