Abli sa publiko ang Butuan City Night Market: A Holiday Tourism and Trade Festival nga nahimutang sa Guingona Park. 102 ka traders ang nisanong sa panawagan sa City Trade Investment City Trade, Industry and Investment Promotion Office kun CTIIPO asa 27 ang non-food traders samtang 75 niini ang food traders. Gipangunahan ni Konsehal Joseph Omar Andaya, Chairperson sa Committee on Trade, Industry, and Development kauban ni Ma. Kristina Cassion, CTIIPO Head ang pag-abli sa Night Market. Alang kang Mary Jean Ramao, usa ka trader, gikalipay niya ang pagbutang og Night Market sa Guingona Park. "Dugay na pod namo ni gipangandoy (ang night market sa plaza), as we can see, plaza is very bibo gyud kay mao ni ang sentro, nag expect me nga naay night market dinhi. Lipay gyud kaayo me,” pahayag ni Mary Jean Ramao. Sa mensahe ni Konsehal Joseph Omar Andaya, gipahayag niini ang pipila ka mga balaod nga nag suporta sa mga gagmay nga negosyante. Gibuhat niya kini para masayran sa mga negosyante nga wala sila gipasagdan sa gobyerno. Nagpasalig sab siya nga hingusgan nila ang pag suporta sa mga gagmay nga negosyante para mapadayon ang night market sa syudad kauban ang buhatan sa CTIIPO. Gidayeg sab ni Konsehal Andaya ang mga negosyante tungod sila ang nagbuhi sa ekonomiya panahon sa pandemya. Ang nasangpit nga kalihukan suportado sa Lokal nga Panggamhanan sa Butuan pinaagi sa CTIIPO sa tumong nga mahatagan og platform ang mga Local MSME's nga mapakita ilang mga produkto sa publiko ug mapalapdan ilang kahibalo kalabot sa pag negosyo. Molungtad ang aktibidad hangtud Enero 7, 2024.