Garbo sa syudad sa Butuan ang nakab-ot nga kalampusan sa usa ka Butuanon nga si Casey Angelique Busa Ty, residente sa Barangay Ambago ning syudad sa Butuan. Kini human nag top 9 sa Nursing Licensure Examination bulan sa Nobyembre tuig 2022. Tungod niini, gitimbaya ug gipasidunggan si Ty sa Sangguniang Panlungsod members sa pagpanguna ni Vice Mayor Lawrence Fortun sa dungog nga gidala niini sa syudad ug paghatag og inspirasyon sa mga Butuanon. Subay niini makadawat og cash incentives si Ty ilawom sa SP Resolution no.006-2023 pinasubay sa SP Ordinance no. 5545-2018 nga aprobado ni Mayor Ronnie Vicente Lagnada. Makuha ni Ty ang cash incentives inig mahuman og maproseso sa City Education, Literacy and Scholarship Office kun CELSO. Si Ty produkto sa FSUU Morelos Campus gikan elementarya hangtud Senior High ug mi-eskwela sa kolehiyo sa Cagayan de Oro City asa kasamtangan nang nagtrabaho isip nurse sa usa ka ospital sa nasangpit nga syudad.