Nagmadaugon na sab sa International Competition ang Butuanong atleta nga si Breanna Labadan sa bag-ohay lang nga 2023 FIG International Rhythmic Gymnastics Tournament Gracia Fair Cup sa Budapest Hungary, miaging semana. Duha ka medalya ang nakuha ni Labadan. Nakuha niya ang Silver Medal sa Ribbon Category ug Bronze Medal sa Clubs Category. Tungod niini, gilauman nga dunay insentibo nga madawat si Labadan ilawom na sa SP Ordinance No. 6169-2020 o mas nailang Sports Incentives Ordinance sa Butuan City nga gipangamahanan ni Konsehal Cromwell Nortega. Mapasigarbohon ang syudad sa Butuan sa nakab-ot nga kadaugan ni Labadan ug nanghinaot nga daghan pang medalya iyang makab-ot sa umaabot nga mga kompetisyon.