Nakadawat og qualifier incentives nga nagkantidad og 50,000 pesos si Breanna Labadan gikan sa LGU Butuan pinaagi ni Mayor Ronnie Vicente Lagnada kaganinang buntag. Kini human nahimu siyang kwalipikado sa 39th FIG Rhythmic Gymnastics World Championship adtong Septyembre 14-18 tuig 2022 sa Sofia Bulgaria. Ang paghatag og qualifier incentives kang Labadan subay sa SP Resolution No. 350-2022 nga gipangamahanan ni Cynth Zephanee Nietes ug gi-aprobahan ni Vice Mayor Lawrence Fortun. Subay sab kini sa SP Ordinance No. 6169-2020 o mas naila nga Sports Incentives Ordinance sa Butuan City nga gipangamahanan ni City Councilor Cromwell Nortega nga aprobado ni Mayor Ronnie Vicente Lagnada. Gihingusgan ni Mayor Lagnada ang paghatag og insentibo sa tanang butuanong atleta pinaagi sa City Sports Office aron mas makadasig sa mga atleta nga mupursige sa pangandoy sa natad sa sports aron usab makadasig sa ubang kabataan nga musulod ug motutok sa sports nga usa sa nakahatag og dakong dungog sa syudad sa Butuan.