Nahimong malampuson ang paglusad sa Buhay Ingatan Droga Ayawan kun BIDA sa Dotties Place Convention Hall ning syudad nga gipangunahan sa Department of Interior and Local Government kun DILG, Sabado. Gitambungan kini sa mga kabatan-onan gikan sa managlahing syudad o munisipyo sa probinsya sa Agusan Del Norte, mga opisyal sa 86 ka Barangay sa Butuan City, kapulisan, PDEA, ug mga media. Nahimong speaker si DILG Secretary Benjamin "Benhur" Abalos, Jr. asa gipakita niya ang epekto sa druga sa panglawas. Gi-awhag sab niya ang tanan labi na ang mga kabatan-onan nga mag likay sa bisan unsa nga klase sa druga ug mahimong aktibo sa ehersisyo o kaha mga isports nga makapadugang sa kadasig para mahimong magmalampuson sa kinabuhi. Sa mensahe nga gihatag ni Konsehal Joseph Omar Andaya dili malimod nga daku ang problema pag-abot sa druga rason nga kinahanglan nga dunay collaborative approach ang gobyerno, law enforcement agencies, eskwelahan, community leaders ug tanan tao sa katilingban para mapakgang na ang druga. Samtang nipirma sab ang mga partisipante sa Unity Statement nga giandam sa DILG isip pag suporta sa kampanya batok iligal nga droga. Duna sab BIDA Serbisyo Caravan asa naghatag og serbisyo ang mga opisina sama sa City Government sa Butuan, Provincial Government of Agusan Del Norte, DILG XIII-Caraga Regional Office, PNP-PRO 13, PDEA XIII, DOH XIII, TESDA XIII, CHED XIII, NCMF XIII, PAO XIII, ug PSA XIII. Ang Lokal nga Panggamhanan sa Butuan suportado ang bisan unsa nga kalihukan sa pagpakgang sa iligal nga druga para malikay ang tanang residente sa Butuan labi na ang mga kabatan-onan sa dili maayong epekto niini sa panlawas ug sa komunidad.