Nagsugod na ang budget hearing sa annual budget alang sa tuig 2024 sa mga buhatan sa lokal nga panggamhanan sa Butuan. Nanguna niini ang City Treasury Department, City Human Resource Management Department, City Information Communication and Technology Department, City Budget Office, City Transportation ug Traffic Management Department ug City Civil Registry Department. Sa deliberasyon ug presentasyon sa padulngan sa pondo sa matag buhatan strikto kining gisusi ug girepaso sa komitiba sa appropriation ug accounts nga gipangunahan ni Konsehal Vincent Rizal Rosario kinsa temporaryong presiding officer uban nila Konsehal John Gil Unay, Eduardo Gonzalez, Arturo Gado, Cherry May Busa, Victor Plaza, Cromwell Nortega ug Liga ng mga Barangay President Gemma Tabada. Gisiguro sa SP members nga han-ay ug haum ang nakalatag nga mga plano ug proyekto sa pagpalambo ug malungtarong serbisyo sa tibook dakbayan sa Butuan.