Suportado sa hiniusang pwersa sa lokal nga panggamhanan sa Butuan pinaagi nila Mayor Ronnie Vicente Lagnada, Congressman Jose Aquino II, Vice Mayor Lawrence Fortun, City Councilor Cromwell Nortega ug mga kaubanan sa konseho ang gipahigayong Bloodletting Activity nga gipangunahan sa Philippine Guardians Brotherhood Inc. miaging semana sa Robinsons Place Butuan. Kini nga kalihukan kabahin sa health advocacy program sa nasangpit nga organisasyon nga naglaum nga daghang matabangan ug matubag ang nagkataas nga ihap sa mga pasyenteng nagkinahanglan og dugo nga kasamtangang anaa sa nagkadaiyang balay tambalanan ning syudad. Hinungdan hugot usab kining gisuportahan sa mga pribadong indibidwal nga walay duha-duhang midonar og dugo apil na niini ang mga personahe sa Philippine National Police ug ubang ahensya. Subay niini, mapasalamaton ang mga opisyal sa kalampusan sa aktibidad ug sa tanan nga misanong sa panawagan nga modonar og dugo aron dunay igong supply ang Red Cross Butuan City Chapter sa katuyuan nga matabangan ang mga nagkinahanglan og dugo.