Gitigum sa City Agriculture and Veterinary Department kun CAVD ang mga Vegetable Farmers sa syudad sa Butuan alang sa binulan nga konsultasyon ug update sa tagsa-tagsa kahimtang niini sa DOP Building, Barangay Tiniwisan ning syudad kagahapon. Pinaagi niini, masuta ang resulta isip pinaka-unang nakabenipisyo sa agriboost project sa lokal nga panggamhanan sa Butuan. Base sa datus ug profiling nga gihimo sa nasangpit nga buhatan daghan na sa mga mag-uuma ang maka testify sa dakung kabag-uhan sa ilang abot sukad miabot ang agriboost project. Atol sab sa panagtigum, gidasig ug gipasabot ang mag-uuma kalabot sa Registration sa mga mag-uuma sa Agribloom Mobile App aron mao na ang gamiton sa pagdawat og orders nga gulay gikan sa mga vendors sa syudad. Tun-an ang Climate Outlook, Farmers Delivery Review ug ang kaayuhang makuha kung usa kini sa Agriboost farmer-partner, Gihisgutan sab ang Orders ug Commitment sa bulan sa Pebrero hangtud Mayo tuig 2024 aron hapsay ang pagdeliver niini og gulay sa Agrihub Facility subay sa demand ug orders sa vendors ug ang paghisgut sa delivery schedule sa Agrihub facility. Pipila sa mga Vegetable Farmers nagpasalamat sa pag abot sa Agriboost Project. Gani usa kini sa nakatabang nga makapatungha sa mga anak sa kolehiyo sama ni Shirly Cultura sa Barangay Baobaoan nga nakapatungha og anak sa usa ka pribadong tunghaan. “Hayahay gyod karon kay sauna ang buyer ang magbuot ang Tabuan ang magbuot kong pilay presyo usahay pa gyod malabay namo among product. Karon daku kaayo akong pasalamat sa agriboost nga na myembro ko sa agriboost. Karon nag expand nami kay medyo okey naman ang kita so makaingon ko nga bintaha gyod karon kay sauna. Sa karon prariority nako akong mga anak kay naa koy duha ka college wala mi lain gisaligan ang kita ra gyod namo sa garden.” pahayag ni Shirly Cultura, Vegetable Farmer sa Barangay Baoboan. Samtang ang kanhi OFW nga si Cha Murcota gipili ng mag farming aron pirming makauban ang pamilya. Nag expand na kini sa iyang area sa gulayan asa nahimutang sa Barangay Bit-os ning syudad. Kini gumikan sa padayong suporta kaniya sa Agriboost Project. Gipaningkamutan ni Mayor Ronnie Vicente Lagnada ang padayong paghatag ug pag giya sa mga mag-uuma pinaagi sa CAVD aron hingpit nang makab-ot sa syudad sa Butuan ang food self sufficiency ug dili na muangkat pa sa laing dapit og gulay ug uban pang crop ug commodities ang mga vendor sa dakbayan sa Butuan.