Gibisitahan ni Butuan - Agusan del Norte First District Representative Jose Aquino II ang Barangay Sumile ning syudad, Mayo 1. Kini aron personal nga makita ang kahimtang sa barangay ug masayran ang angayang ibubo nga proyekto niini ug hatagan og igong prayoridad. Ang Barangay Sumile usa sa barangay nga dunay dakung potensyal nga makapalambo sa turismo sa syudad tungod sa padayong ginadagsa sa katawhan nga Zoological ug Botanical Park diin makita ang friendly nga mga unggoy. Usa kini sa talagsaon nga talan-awon ug angayang ampingan ug palambuon. Nakita ni Congressman Aquino ang kamahinungdanon sa maayo ug plastadong dalan sa barangay ingon man halos residente dinhi panguma ang panginabuhian nga labaw’ng nagkinahanglan og maayong dalan aron dili madaot sa byahe ang mga abot. Dakung kalipay ni Punong Barangay Dominador Paglinawan nga nabisitahan ang iyang barangay sa mga opisyales sa syudad bisan pa nga holiday. Naglaum kini nga daghan pang proyekto ang muabot sa ilang barangay. Kauban ni Congressman Aquino sa pagbisita sila City Councilor Cromwell Nortega, Konsehal Vincent Rizal Rosario ug Konsehal John Gil Unay.